الماتى قالاسىنىڭ ازاماتتىق ىستەر جونىندەگى مەدەۋ اۋداندىق سوتىندا Ratel.kz پورتالىنا  قاتىستى شەشىم قابىلداندى،- دەپ جازادى Qamshy.kz اقپارات اگەنتتىگى.

Cۋديا گۇلميرا بەيسەنوۆا "Ratel.kz گازەتىنىڭ شىعارىلۋىن توقتاتۋ ، Ratel.kz دومەندىك اتاۋىن قايتا تىركەۋدەن باس تارتۋ جانە باس رەداكتور مارات اسيپوۆقا جانە باسقا دا قىزمەتكەرلەرگە سايت ماتەريالدارىن باسقا بۇقارالىق اقپارات قۇرالدارىندا، سونىڭ ىشىندە الەۋمەتتىك جەلىلەردە جاريالاۋعا تىيىم سالۋ تۋرالى مەدەۋ اۋداندىق پروكۋراتۋراسىنىڭ تۇسىرگەن شاعىمى ءىشىنارا قاناعاتتاندىرىلدى. Ratel.kz اناليتيكالىق ينتەرنەت-پورتالىنىڭ ونلاين-رەداكسياسىنىڭ جۇمىسىن توقتاتۋ، قازاقستاندىق باق-تا ءبىر جىل بويى Ratel.kz دومەندىك اتاۋىن پايدالانۋدى تىيىم سالۋ"، - دەگەن شەشىم شىعاردى. سونداي-اق، سوت شەشىمى "Ratel.kz پورتالىنىڭ باس رەداكتورى مارات اسيپوۆقا Ratel.kz ينتەرنەت-پورتالىنان اقپاراتتىق ماتەريالداردى، ينتەرنەت-رەسۋرستاردا جانە Ratel.kz، Balborsyk.kz، wildratel.com دومەندىك اتاۋلارىنا ارنالعان اقپاراتتىق ماتەريالداردى شىعارۋعا جانە تاراتۋعا تىيىم سالادى"، - دەدى سۋديا گۇلميرا بەيسەنوۆا.

باس رەداكتور مارات اسيپوۆ سوت شەشىمىنە شاعىمدانۋعا نيەتتى ەكەنىن ايتتى. 

2018 جىلدىڭ ناۋرىزىندا باس پروكۋراتۋرا ratel.kz دومەنىن ءوشىرۋ ءۇشىن قورعانىس جانە اەروعارىش يندۋستريا مينيسترلىگىنىڭ «اقپاراتتىق قاۋىپسىزدىك كوميتەتى» رسب-نا نۇسقاۋ بەرگەن. دومەن 2017 جىلدىڭ 3 جەلتوقسانىندا قايتىس بولعان گەنناديي بەنديسكييمەن تىركەلگەن ەدى.

 باقىلاۋشى ورگان «بەنديسكييدىڭ دومەندىك اتاۋدى تىركەۋگە وتىنىمىندە كورسەتىلگەن دەرەكتەر ءقازىر «تولىق ەمەس نەمەسە سەنىمسىز» بولىپ سانالادى، بۇل «ينتەرنەت جەلىسىنىڭ قازاقستاندىق سەگمەنتىندە دومەندىك اتاۋلاردى تىركەۋ، پايدالانۋ جانە تاراتۋ ەرەجەلەرى» دەگەن قاعيداتتى بۇزۋ بولىپ تابىلادى» دەپ تۇسىنىكتەمە بەرگەن.

ەستەرىڭىزگە سالا كەتەيىك، ratel.kz قازاقستاندىق ساراپتامالىق سايتى 19 ناۋرىز كۇنى  كۇتپەگەن جەردەن ىستەن شىققان بولاتىن. پورتالعا VPN ارقىلى نەمەسە باسقا تاسىلدەرمەن كىرۋ مۇمكىن بولماعان.

پايدالانۋشىلارعا ىڭعايلى بولۋ ءۇشىن بارلىق ماتەريالدار ۋاقىتشا Balborsyk.kz دومەنىنە اۋىستىرىلدى. ارتىنشا Ratel.kz رەسمي سايتىنىڭ ماتەريالدارىن Facebook الەۋمەتتىك جەلىسىندە جاريالاۋ تۋرالى شەشىم قابىلداندى، ءبىراق ورگان كەيىننەن بۇل ارەكەتتەرگە دە تىيىم سالدى.

بۇدان كەيىن رەداكسيانىڭ جۋرناليستەرىنە الماتى قالاسىنىڭ مەدەۋ اۋداندىق پروكۋراتۋراسىنان ارىز ءتۇستى. سوتتىڭ ءبىرىنشى وتىرىسى جابىق ءوتىپ، كوپتەگەن جۋرناليستەر ءوز ارىپتەستەرىن قولداۋ ءۇشىن ارنايى كەلگەن بولاتىن.

تانىمال قازاقستاندىق پورتالدىڭ جۇمىسىن ويدا جوقتا توقتاتىپ تاستاۋ ءبىرىنشى رەت بولعان وقيعا ەمەس. 2015 جىلدىڭ قىركۇيەك ايىندا Ratel.kz سايتى بەلگىسىز سەبەپتەرمەن بۇعاتتالىپ، بەس ايدان كەيىن قايتا ىسكە قوسىلعان.